CEBU, Philippines - Si Chief Insp. Ceferino Tabay Jr., deputy chief sa Bogo City Police Station, gi-rekomendar sa Provincial Investigation and Detective Management Branch (PIDMB) nga pasakaan og kasong grave misconduct human nila makita nga aduna kini tulubagon sa pagkulata ug pagpusil patay kang Vincent Paul Montesclaros, 17.
Si Tabay maoy suspek sa pagpatay kang Montesclaros adtong Abril 5 sa Barangay Guadalupe. Sa pre-charge evaluation sa PIDMB, si Tabay nakalapas sa National Police Commission (NAPOLCOM) Memorandum Circular 2007-001 Rule 21, Section 2. Ang PIDMB miduso na sa maong kaso sa Police Regional Office (PRO)-7 alang sa pagpahigayon og summary hearing.
Gawas sa kasong administratiba, kasong murder ang napasaka na usab batok kang Tabay sa Branch 61 sa Regional Trial Court sa dakbayan sa Bogo.
Si Tabay giingong mipatay kang Montesclaros, kinsa uyab sa anak niini usa ka hapon niana human niya makita nga nagdugo ang ilong sa iyang anak.
Si Tabay miingon nga armado si Montesclaros atong higayuna maong iya kining napusilan. (BANAT NEWS)