Yellow sub wa mobangga sa gasang

CEBU, Philippines - Gihimakak sa operator sa “Yellow Submarine” ang alegasyon nga nakadumbol sila og gasang sa kadagatan sa siyudad sa Lapulapu.

“The submarine was in the right distance” mao kini ang pamahayag ni Agnes Escaño, ang spokesperson sa Cebu Yellow Submarine, kagahapon sa ilang gipahigayon nga press conference.

Ang panghimakak sa kompanya kalabot kini sa migawas nga video sa YouTube nga nagpakitang nadasmag sila sa usa ka gasang o coral reef. Kini maoy hinungdan nga mipagawas si Mayor Paz Radaza og cease  and desist order sa kompanya alang sa imbestigasyon.

Matud pa ni Escaño “optical illusion” ang nakita diha sa video nga resulta sa anggulo sa pagkakuha sa video nga kung tan-awon naigo kini sa coral reef apan sa pagkatinuod wala, samtang ang daw naukay nga lapok nga daw epekto sa pagbangga, gihulagway kini ni Escaño nga epekto sa nagtuyok nga propellers.

Matud pa niya patakaran na nila nga kinahanglang 6-metros ang distansya sa submarine gikan sa gasang.  (BANAT NEWS)