Kaso sa ‘shoplifter’ ipasa sa CCPO ngadto sa NBI-7

CEBU, Philippines - Itugyan na lang sa Cebu City Police Office ngadto sa National Bureau of Investigation alang sa pagsulbad sa kaso kalabot sa kamatayon sa gipasanginlang “shoplifter” nga gidudahang gikulata apan napatay nga si Mario Alfie Ducayag.

Si Sr. Supt. Mariano Natuel Jr. director sa CCPO mipadayag nga agi og respeto sa pamilyang Ducayag ila nang gitugyan ngadto sa NBI-7 ang kaso.

Gibabagan sa pamilyang Ducayag ang pagduso sa CCPO og kaso ngadto sa piskalya niadtong miaging adlaw batok kang Jeffrey Aquino nga usa sa gitumbok nga mikulata kang Ducayag sud sa mall kay buot sa pamilya nga ang tanang nalambigit pagdagmal sa biktima ang makasohan.

Samtang gidepensahan ni Natuel si Dr. Nestor Sator nga gisaway sa pamilyang Ducayag tungod kay lahi ang resulta sa awtopsiya niya sa gihimong awtopsiya sa NBI medico legal.

Tungod sa pagbabag sa pamilyang Ducayag, gibuhian sa CCPO si Aquino sa miaging gabii.

Samtang  gipahibalo ni NBI-7 director Antonio Pagatpat nga mag-case conference sila uban sa CCPO ini’g turnover sa PNP sa tanang dokumento kalabot sa kaso. (BANAT NEWS)