Mga kandidato sa Sta. Fe mipirma sa Peace Covenant

CEBU, Philippines - Nagpirmahay og kasabutan alang sa malinawong pagpahigayon sa piniliay karong Mayo 13 ang tanang lokal nga kandidato sa lungsod sa Santa Fe, isla sa Bantayan kagahapon.

Kini gipahigayon dayon tapos sa Santos nga Misa sa simbahan sa parokya sa Sto. Niño Parish nga gipangulohan ni Padre Isidrito Ducao.

Ang independenteng kandidato sa pagkabise-gobernador Glenn Anthony Soco ang lakip na sa nakapirma sanglit naatol nga nakatambong siya sa misa isip kabahin sa iyang pagpangampanya sa isla sa Bantayan kagahapon.

Nangulo sa pagpirmahay mao ang tulo ka kandidato pagka-mayor nga sila si Mayor Jennifer Ilustrisimo sa Liberal Party, Jose Esgana sa One Cebu ug independente nga si Edmund Aniana ug ilang mga bise-mayor ug 21 ka kandidato pagkakonsehal.

Misaksi sa pagpirmahay sila si Santa Fe Police Station chief, Insp. Ricardo Echavez ug Election Officer Alex Villacruces.

Matud pang Villacruces nga unang higayon nga ang Santa Fe wala nalakip sa watchlist sa Commission on Election.

“Ako gi-emphasized nga dili sila kontra kundili kaatbang sa politika,” matud pang Villacruces.Ang independenteng kandidato pagka-konsehal, Atty. Jayson Repaso, nanghinaut nga sundon sa uban ang ilang gipirmahan.(Gregg M. Rubio/EIM)

Soco gipaila sa pari nga “alternative candidate”

Ni Gregg M. Rubio

Gipaila-ila sa pari sa Sto. Niño Parish sa lungsod sa Santa Fe ang independenteng kandidato sa pagkabise-gobernador, Glenn Anthony Soco, isip “alternative candidate.”

Si Padre Isidrito Ducao nihimo sa pagpaila-ila atol sa misa kagahapon diin nakatambong si Soco isip kabahin sa iyang pagpangampanya sa isla sa Bantayan kagahapon.

“Gawas sa naandan  nga kinaraang pamolitika nga usa ta ka bag-ong kandidato nga adunay mga preskong panglantaw ug bag-ong panglihok-lihok, ako nalipay nga nakit-an ni sa pari ug sa simbahan,” matud pa ni Soco isip iyang reaksiyon.

Nakighimamat kang Soco ang mokabat 700 ka sakop sa New Guardians Inc. kinsa adunay kalihukan sa lungsod sa Santa Fe kagahapon ug ilang gipasalig ang ilang hugot nga suporta.

Gibisitahan usab ni Soco ang pipila ka barangay sa lungsod sa Bantayan ug Madridejos diin nipahigayun siya og pulong-pulong. “Nagkinahanglan kita og bise gobernador nga may kadasig nga mosuroy ug mahikap,” matud pa ni Soco. Gilabtikan usab ni Soco ang iya ang kaatbang nga si acting Governor Agnes Magpale sa mga pagsaway niini sa mga transaksiyon sa kanhi niya alyado nga si suspendidong gobernador, Gwendolyn Garcia.

Gisaway ni Soco ang slogan ni Magpale nga “Ang Sayop Saktohon” ingon man ang panawagan niini nga kausaban.

“Sakto ba gyud nang mangilog og microphone? Apil siya sa angayan ilisan kung maghisgot man ta og kabag-ohan,” matud pa ni Soco. Hinuon si Magpale kusganong mihimakak bahin sa pagpangilog og mikropono.

Si Soco giingong mao ang kandidato sa pagka bise gobernador nga nakalibot sa mga barangay sa isla sa Bantayan lakip na sa mga isla.

Niadtong Sabado, nilibot usab si Soco sa mga lungsod sa Tabogon, Bogo City, San Remegio, Daanbantayan ug Medellin. (BANAT NEWS)