CEBU, Philippines - Kritikal ang kahimtang sa usa ka senior citizen human kini dasmagi sa taxi sa iyang paglabang sa karsada didto sa pag-utlan sa barangay Cansaga ug barangay Pitogo sa lungsod sa Consolacion sa miaging hapon.
Ang biktima mao si Virgilia Monisit, 60, minyo, ug molupyo sa barangay Pungdol, sa maong lungsod, samtang ang nakadasmag kaniya mao ang Toyota Vios Sedan nga iya sa KEN taxi nga gimaneho ni Renato Garso Palatio, 50, ulitawo, nga may kapuyo, ug nagpuyo, sa Sitio Cogon, Tayud, Consolacion.
Si PO3 Arthur Ariate sa Consolacion Police Station mibutyag sa Banat News nga subay sa pasiunang imbistigasyon, ang biktima milabang sa karsada kadungan sa ubang tawo, apan dihang nakita niini ang usa ka sakyanan nga kusog kaayong nagdagan paingon sa ilang nahimutangan, mibalik kini sa agi hinungdan nga nadasmagan kini sa maong taxi nga nagpaingon sa dakbayan sa Sugbo.
Ang biktima nga nalamba sa karsada gidali paghatod ngadto sa tambalanan sa dakbayan sa Sugbo gumikan sa mga samad ug pangos sa nagkalainlaing bahin sa kalawasan niini.
Samtang ang drayber sa taxi mitahan dayun sa kapolisan ug nabalhug na karon sa karsel samtang gihikay ang tukmang sumbong nga ipasaka batok niya. (BANAT NEWS)