CEBU, Philippines - Namatay ang usa ka drayber sa traysikad human kini dunggaba sa wala hiilhing kriminal didto sa sitio Plastikan, barangay Duljo-Fatima, dakbayan sa Sugbo kagahapon sa alas 3:00 sa kaadlawon.
Ang biktima nailhan nga si Argel Calinawan, 22, drayber sa traysikad nga nagpuyo sa maong dapit.
Matud pa ni SPO4 Alex Dacua, imbistigador sa Cebu City Police Office nga ang biktima nag-parking sa maong lugar samtang nagpaabot og mga pasahero.
Apan matud pa sa mga nakasaksi nga kalit lang miabot ang duha ka wala hiilhing mga lalaki ug sa walay igong hinungdan giluba niini ang biktima.
Tungod kay nagtalikod, gitangkugo kini pagdunggab ug giusban sa tiyan nga maoy hinungdan sa hinanaling kamatayon niini.
Ang mga kriminal mibiya usab dayon sa maong dapit human makita niini nga nasabak sa patyanan ang biktima.
Padayon nga gipangita sa kapolisan ang mga kriminal aron pagsuta sa hinungdan sa maong pagpangluba. (BANAT NEWS)