CEBU, Philippines - Delikado ang kahimtang sa usa ka lalaki human kini pusila sa iyang ka-text-mate didto sa Sitio Ibabao Gisi, Brgy. Marigondon dakbayan sa Lapulapu sa milabay’ng hapon.
Ang biktima mao si Andrew Tampus Gelig, 33, ulitawo ug residente sa Brgy. Agus dakbayan sa Lapulapu. Sa pasiunang imbestigasyon ni P/Insp. Zenaido Pastorfide, hepe sa Homicide section sa Lapulapu Police Station nasuta nga mga alas 3:45 sa milabay’ng hapon usa ka Tofe Rasul, hingkod, nga taga Brgy. Marigondon mi-text sa biktima nga makigkita sa maong dapit.
Busa miadto ang biktima sa maong lugar ug sa iyang pag-abot didto kalit siyang gipusil sa suspetsado. Ang biktima nga nasabak sa tulo ka mga bala sa nagkalainlaing bahin sa lawas dali nga gihatud sa iyang mga kabanay ngadto sa Mactan Doctors Hospital ubos sa talandugong kahimtang.
Matud pa ni Insp. Pastorfide nga ila pang gisubay ang nahimutangan sa suspek aron kini masikop ug masayran ang motibo sa maong pagpamusil. (BANAT NEWS)