Napusilan patay sa kapolisan No. 1 drug pusher

CEBU, Philippines - Numero unong tigpayuhot og drugas sa barangay  Babag 2, sa dakbayan  sa Lapulapu  ang napusilan patay sa kapolisan sa City Anti-Illegal Drugs Special Operation Task Group (CAIDSOTG) didto  sa maong  barangay  sa miaging hapon.

Ang hepe sa kapolisan sa dakbayan sa Lapu-lapu Sr. Supt. Rey Lendon Lawas mibutyag  sa Banat News nga ang namatay  nga  giila  lang  sa  ngalang  Shaman  baniog  kaayo  sa pagka-pusher  og  shabu  sa ilang  lugar.

Matud pa ni Lawas nga si Shaman maoy leader sa grupo   nga gipasakopan  ni  Sandy Casul  ug  Amadeo Abad kinsa  pulos  na  nasikop  sa kapolisan.

Dugang pa ni Lawas nga si Shaman igo lamang nga modawat sa ihatod kaniya nga drugas  gikan  sa wala  hiilhi  niyang  supplier ug  siya  nay  moapud-apod  niini  ngadto sa iyang  mga  sakop  aron ihatud  sa ilang  mga suki.

Gani, niadtong Biyernes sa hapon, sulod lamang sa tulo ka oras sa wala pa   ang  buy  bust, nakahalin na sila si Shaman   og P6 mil kapin   gumikan  sa kadaghang  tiggamit  og  drugas  sa lugar  diin  nila maengkuwentro   ang  suspek.

Samtang si Casul ug  si Abad miangkon    nga dili pa lang sila dugay nga misulod sa maong   trabaho,  apan daan  na silang   tiggamitan  og  shabu. Sa nasayran pasado alas 4:00 sa hapon niadtong Biyernes,  gipahigayon  ang  buy bust operation sa   kapolisan  dihang  nakabantay si Shaman nga polis ang ilang gikatransakyon, busa  mikaratil kini og dagan paatubang sa kabato-ang  lugar.

Tungod  kay  mipabuto kini sa iyang  armas de fuego napugos  sa pagbawos  ang  kapolisan   ug  nasabak  siya  sa tiyan  ug  tiil.

Apan  bisan  samaron  midagan  pa  si  Shaman  ug  misawom  sa sapa  sa  maong  dapit  dihang  gisusi  sa kapolisan  wala  na  maglihok  si  Shaman  busa  ila  kining  gihatod  ngadto   sa Lapu-lapu City District Hospital diin  kini  ideklarar  nga Dead on Arrival. (BANAT NEWS)