CEBU, Philippines - Patay ang drayber sa usa ka motorsiklo human kini mabangga sa usa ka taksi sa barangay Poblacion sa lungsod sa Sibonga kagahapon pasado alas 6:00 sa buntag.
Ang biktima mao si Marlon Montera, 25, nagpuyo sa barangay Bato sa maong lungsod. Ang driver sa PANG GANG taxi nga gimaneho ni Wilfredo Igay , 38, nagpuyo sa Sitio Talaytay sa Barangay Cambigong diha sa Samboan kinsa gitanggong na sa kapolisan.
Sa imbestigasyon ni PO2 Ederlino Bacusmo, ang motor ug taksi nagsubay sa national highway sa maong dapit. Si Montera adunay sakay nga usa ka 24-anyos, nga ginganlan og Marjan Ordeñiza padulong sa South.
Pag-abot sa kurbadahong bahin sa maong highway ang driver sa motorsiklo nawad-an og control ug kalit nga natumba sa tunga sa kalsada maong nabanggaan kini sa kasugat nga taxi.
Si Montera nakaangkon og mga samad sa lawas ilabina sa iyang ulo nga gidali pagdala sa Deiparine Medical Clinic apan gideklarar nga patay na ni Dr. James Deiparine samtang ang angkas niini nga si Ordeñiza gidala sa Carcar district Hospital. (/EIM) (FREEMAN)