CEBU, Philippines - Usa ka 15-anyos nga giingong rugby boy ang napusilan sa gwardiya sa milabay’ng gabii atubangan sa Verbena Pension House, Don Hill Garcia St., sa Brgy. Capitol Site dakbayan sa Sugbu.
Ang 15-anyos nga bata lumulupyo sa Sitio Baho, Brgy. Calamba ning dakbayan kinsa nakaangkon og samad pinusilan sa walang paa.
Sa pasiunang imbestigasyon sa Homicide Section sa Cebu City Police Office, ang biktima kauban sa lima ka mga barkada nga nag-edad gikan 14-anyos ngadto sa 16-anyos misuway og sud sa maong pension house maong gibadlong kini sa gwardiya nga si Jessie Sevado.
Sumala pa sa biktima gikuptan sa gwardiya ang usa sa iyang barkada maong mipunit siya og bato ug gibato ang gwardiya apan gipusil sa suspek ang walang paa sa biktima.
Apan si Sevado miingon ang biktima ug lima ka mga kauban giukay ang basurahan maong iyang gisitar apan sa iyang pagduol gitionan hinuon siya og kutsilyo sa biktima hinungdan nga iyang gipusil ang paa niini.
Matud pa niya una niini, nakit-an niyang nagsige og hingos og rugby ang maong mga bata.
Ang biktima gidala sa Chung Hua Hospital samtang ang suspetsado mitahan nila ni PO3 Mark Eric Sy ug PO1 Brando Nacario.
Nakuha sa suspetsado ang kalibre 38 nga revolver SN 8755611 ug g-turnover sa homicide. Ang kapolisan miingon ang napusilan nga bata gireklamo na diay kaniadto tungod sa pagpanglabni. (/EIM) (BANAT NEWS)