CEBU, Philippines - Giklaro ni National Bureau of Investigation-7 director Atty. Antonio Pagatpat nga wala silay nadawat nga report nga aduna silay mga agents nga na-assign sa Liloan nga nalambigit sa pagpamusil patay sa usa ka tawo diha sa sitio Cogon sa barangay Poblacion niadtong Miyerkules sa gabii.
Kini may labot sa tulo ka lalaking nagpailang NBI nga nagdungan pagpusil patay sa biktimang si Juanito Martinez.
Matud pa niya, ilahang giseryoso ang imbestigasyon kung tinuod ba gyud nga ilahang sakop ang namusil sa Liloan.
Giawhag sad niya ang pamilya sa biktima nga mobisita sa ilahang buhatan aron mo-file og kaso kabahin niini. Matud pa nga bisan ang pamilya ni Martinez dili motuo nga NBI agents ang namusil sa biktima. Gipadayag pud ni Pagatpat nga kung masutang ilahang sakop ang nalambigit sa krimen dili nila kini duphan.
Si Martinez luwan sa iyang motorsiklo dihang gi-overtake-an sa usa ka motor nga dunay tulo ka mga nagsakay nga lalaki nga nagpailang mga NBI apan pag-abot sa unahan nagdungan ang tulo sa pagpusil sa biktima. (/EIM) (BANAT NEWS)