CEBU, Philippines - Tulo ka mga nagpailang mga sakop sa National Bureau of Investigation (NBI) nagdungan sa pagpusil patay sa usa ka tawo nga nag-angkas sa motorsiklo nga gimaneho sa iyang pag-umangkon didto sa sitio Cogon, barangay Poblacion sa lungsod sa Liloan sa miaging gabii.
Giila ni PO3 Jesson Gayo sa kapolisan sa maong lungsod ang biktima nga si Juanito Martinez, 36 anyos, ulitawo nga taga Ponce Compound, sa dalan Villagonzalo, dakbayan sa Sugbo.
Matud pa ni PO3 Gayo nga ang biktima miangkas sa motor nga gimaneho ni Niño Martinez, nga iyang pag-umangkon paingon sa balay sa iyang igsoon sa sitio Cogon, sa barangay Poblacion sa maong lungsod. Dugang pa niya nga pag-abot nila sa maong dapit gi-overtikan sila sa usa ka motorsiklo nga gisakyan og tulo ka tawo. Pag-abot niini sa unahan mihunong ug gipara ang motorskilo nga gisakyan sa biktima.Sa ilang paghunong, diha-diha ang tulo nga nagpaila nga mga sakop sa NBI nagdungan og pusil sa biktima.
Midugang si PO3 Gayo nga human mahagba sa yuta ang biktima, dali kaayong mipabulhot sa ilang sakyanan ang mga kriminal ug gibiyaan ang biktima nga naglunang sa kaugalingong dugo niini. Ang biktima dali nga gihatud sa iyang pag-umangkon ngadto sa hospital diin didto kini ideklarar nga patay na sa pag-abot didto.
Nasuta nga nabulit sa mga samad sa mga bala ang nagkalainlaing dapit sa lawas sa biktima nga maoy hinungdan sa hinanaling kamatayon niini. Ang mga polis nga mirespondi sa maong hitabo nakapunit og upat ka kabhang sa bala sa 45 kalibre nga pistol nga gituohang maoy gigamit sa mga kriminal nga mipatay sa biktima.
Gisusi sa kapolisan ang nagkalainlaing anggulo diin usa niini mao ang kalagmitang hilabihang kalagot sa mga kriminal batok sa biktima.Kini tungod kay wala nila ilakip sa pagpusil ang pag-umangkon nga kauban niini. (BANAT NEWS)