CEBU, Philippines - Ang syudad sa Sugbo maoy mo-host sa Visayas Power Summit nga ipahigayon karong umaabot Abril 26 ning tuiga diin pagahisgutan niini ang kabahin sa isyu sa tinubdan sa kuryente sa rehiyon.
Matud pa ni Mayor Michael Rama sa syudad sa Sugbo nga kining maong summit agi og tubag sa daghang isyu nga giisa atol sa consultation activities sa Regional Development Council (RDC) sa Central Visayas mahitungod sa power related concerns sa rehiyon.
Si Rama milingkod usab isip Chairperson sa Regional Development Committee sa Kabisay-an.
Gipadayag ni Rama nga kinahanglang hatagan og gibug-aton ang paghatag og kasulbaran sa taas nga presyo sa elektrisidad.
“The most recent activity that RDC 7 conducted has cited as one of the recommendations for immediate implementation the conduct of a Power Summit,†kini matud pa ni Rama.
Sa maong summit ipahigayon usab ang usa ka presentasyon sa power-related issues dili lamang sa Central Visayas kundi lakip na usab sa Sidlakan ug Amihanang bahin sa Kabisay-an.
Si Energy Secretary Carlos Jericho Petilla ang gipaabot nga mopresentar sa 2013-2030 Draft of the Philippine Energy Plan atol sa maong summit.
Hatagan og gibug-aton sa presentasyon ni Petilla ang kalabot sa kasamtangang sitwasyon sa elektrisidad sa nasud, national government's policy thrusts, energy supply and demand outlook, generation and transmission sectors reforms, renewable energy and rates, ug retail competition and open access.
Ang maong usa ka adlaw nga summit pagahimoon pinaagi sa usa ka press conference diin ang panelists mao ang mga opisyales gikan sa Department of Energy (DOE) ug Energy Regulatory Commission (ERC). (BANAT NEWS)