“Killers” sa retiradong kawani sa GSIS nadakpan

CEBU, Philippines - Nasikop na ang duha ka akusado nga gitumbok sa pagpatay sa kanhi  asawa sa retiradong opisyal sa kapolisan nga si Antonietta Espiritu Garlito, retiradong teller sa GSIS  kagahapon didto sa Nivel Hills Brgy. Busay.

Ang mga akusado giila nga sila si Edmund Arnado Tante ug Roid Tante Casas pulos lumolupyo sa maong  dapit. Ang krimen nahitabo niadtong Pebrero 23, 2012.

Matud ni SPO4 Jesus Moga Jr., deputy officer sa Homicide Section sa Cebu City Police Office nga dugay na kaayo nga napasaka ang kaso karon lang nasikop ang mga akusado.           

Miingon usab si  Moga nga ang  affidavit sa witness maoy ilang gihimong basihan aron ipahigayon ang lawom nga imbestigasyon aron masikop ang mga akusado.

Nasikop ang duha human mipagawas og warrant of arrest tungod sa kasong robbery with homicide  si Judge Simeon Dumdum sa  Regional Trial Court Branch 7.

Ang duha nadakpan nila ni SPO1 Victor Ruel Ayuman ug mga kaubanan sa Homicide Section.  Ang duha gipaslak na karon sa Cebu City Jail sa Kalunasan. (BANAT NEWS)