Security briefing alang sa election gipahigayon sa Lapulapu

CEBU, Philippines - Ang Lapu-lapu City Police Office mihimo  og  Final Security Briefing alang  sa umaabot  nga  piniliay didto sa DepEd Building sa BM Dimataga St., Brgy. Poblacion, dakbayan  sa  Lapulapu City, kagahapon  sa buntag.

Ang  maong  briefing gipangulohan  ni  manlalaban  Anna Flur Gujilde, Lapu-lapu City COMELEC Supervisor ug ni P/Supt. Rey Lyndon Lawas  hepe  sa kapolisan  sa maong  dakbayan.

Usa  sa nasabotan  sa maong  security  briefing  mao  ang  bahin  sa  pagpakatap sa kapolisan,  sundawo  sa Armed Forces  of  the Philippines (AFP), Board of Election Inspectors, ug  mga kawani  sa  DepEd.

Matud pa  sa kapolisan  nga 90  porsento  na  silang  andam aron  pagseguro  sa mokabat  sa  173,314 ka mga botante sa Lapu-lapu   sa adlaw  sa eleksyon.

Sa  pagkakaron  nagpaabot na lang sila sa 217 nga PCOS machine  alang  sa  217  ka presinto  sa maong  dakbayan.

Sa laing bahin, si Atty. Gujilde mibutyag  nga ang  Final Testing Sealing  (FTS) sa mga  PCOS  machine   gitakda  nga ipahigayon  karong Mayo 4 diin  idungan  usab  sa   Comelec   ang  pagpatuman   og   mock  election o dili opisyal nga eleksyon sa maong adlaw.   

 Usa  sa tumong niini   mao  nga  ma-testingan ang mga PCOS machine nga maoy gamiton karong umaabot nga eleksyon.

Subli usab nga gipahinumdom ni  Gujilde sa tanan kabahin sa  pagdili  sa  pagpamaligya  og  ilimnong  makahubog   sa panahon  sa election.  (BANAT NEWS)