CEBU, Philippines - Ingon sa gibasol ni Mayor Michael Rama ang mga konsehal sa dakbayan sa nahitabo nga dakong sunog sa barangay Ermita nga mikalas og duha ka tawo ug pagkaugdaw sa kapin duha ka gatos ka panimalay.
Matud pa ni Rama gisugyot niya kaniadto nga mopalit ang siyudad og barge nga gamiton kung dunay sunog sa mga coastal barangays sama sa Barangay Ermita nga gilamoy sa sunog niadtong Sabado nga naglakip sa kabalayan nga gipabarog ibabaw sa tubig.
Si Rama miingon nga idayon gyud niya ang iyang tinguha nga mopalit og barge aron nga kun adunay sunog anha ikarga ang fire trucks ug sa ingon niini nga paagi makahimo kini sa pagpasirit og tubig nga adto manukad sa dagat.
Matud ni Rama nga adto niya kini ipasubli pagpasukip sa budget kun modaug siya sa eleksyon karong Mayo 13.
Ang mga konsehal mibasura sa P50 milyones nga gipangayo ni Rama kay gihulagway nila nga usik-usik ra kini sa kwarta.
Ang pagkasunog sa daghang kabalayan sa Ermita resulta sa kapakyas sa mga bombero nga makasulod sa lugar tungod sa kagagmay sa karsada.
Matud sa mayor nga kapin sa 2,000 ka tawo ang apektado sa sunog sa Barangay Ermita.
Gitan-aw hinoon ni Rama nga ingon sa nagkinahanglan og re-blocking ang dapit nga nasunogan kay ang mga truck sa bombero mireklamo g’yud sa kagamay sa karsada.
Dihang nahitabo ang sunog sa gitawag og Ermita Beach sobra sa napulo ka tuig na ang nakalabay, usa ka trak sa bombero ang naapil pagkasunog kay wala na makabalik tungod sa kahagip-ot sa karsada. (BANAT NEWS)