CEBU, Philippines - Boluntaryong mitahan sa kapolisan ang usa ka lalaking migawas sa hulagway nga usa sa mga responsable sa pagpusil patay sa asawa sa mayor sa Pio V. Corpus nga si Crisanta Lauro niadtong milabay’ng semana.
Si Aljohn Ala, 32, molupyo sa barangay Basak San Nicolas sa siyudad sa Sugbu ang mipatim-aw sa buhatan sa Cebu City Police Office, aron limpyohan ang migawas nga report nga aduna siyay kalambigitan sa pagpusil patay kang Lauro.
Matud pa ni Ala nga iyang nasayran nga migawas ang iyang hulagway ug ngalan sa nagpadayong imbestigasyon sa Homicide Section ug CIB, apan kusganon niyang gihimakak ang pasangil nga may kalambigitan siya sa maong ambush.
Ang hepe sa CIB nga si Chief Insp. Romeo Santander miingon nga sa ilang pagpakita sa nawong ni Ala ngadto sa survivor nga si Konsehal Leny Bitonio Eser wala kini makasiguro kung mao gyud ang gunman.
Matud pa ni Santander nga aduna silay laing anggulo nga gisubay gawas sa una nang gisubay sa mga imbestigador nga mao ang ‘personal grudge’ ug politika.
Matud pa ni Eser misiyagit siya og ‘Pusil! Hupo!’ diha-diha gipaulanan sila og bala samtang sila diha sa taksi apan si Lauro naigo na diay sa dughan ug nausban sa ulo dihang mihangad kini.
“Wala sa koy masulti, pulitika jud siguro ang nagpaluyo ani kay kusog man kaayo ang among grupo mao siguro nga giinitan mi,†pasabot pa ni Eser.
Si Eser, igsuon ni Pio V. Corpus Mayor Hermigildo Betonio kinsa mao usab ang kapuyo sa namatay nga si Crisanta nga mabdos usab atol sa pagbanhig. (BANAT NEWS)