Lola gitulis gipatay sa mga apo

CEBU, Philippines - Gitulis ug gipatay ang usa ka 82-anyos nga byuda sa iya rang  tulo ka mga apo diha sa barangay Cansumoroy sa lungsod sa Balamban niadtong Domingo sa alas 4:30 sa hapon.

Ang biktima nga patay nang naabtan sa mga kabanay mao si Luisa Lafuerto. Tulo ka mga suspek ang nadakpan atol sa hot pursuit operation sa kapulisan mao si Lucio Englatera, 22,  taga Cansumoroy , Balamban; Renan Lafuerta, 21; taga siyudad sa Lapulapu ug Emilio Lafuerta, 20;  nagpuyo ra sab sa maong dapit, giingong mga apo sa biktima.

Matud ni SPO1 Ramon Montecalvo sa Balamban Police dihang nahinabi sa Banat News subay sa inisyal nga imbestigasyon ang biktima nagpuyo sa balay sa iyang apo nga si Renard Taboy.

Ang apo niini nga si Taboy nakadungog sa singgit sa biktima nga nangayo og tabang ug dihang iyaha kining gisusi nakit-an niya  ang mga suspek nga nag-iyahay og panagan palayo agi sa luyong bahin sa pinuy-anan.

Nailhan ang mga suspek tungod sa gisul-ob nila ug namay-ongan usab ang ilang mga dagway hinungdan nga dali ra silang natultolan ug nadakpan atol sa hot pursuit operation sa kapulisan apan wala pa matino kun pila ang kantidad nga natulis sa grupo.

Gidudahan sa kapolisan nga nagdumili ang biktima sa paghatag sa iyang salapi hinungdan nga gidunggab kini sa dughan. Ang biktima matud pa adunay kwarta nga P50 mil nga halin sa yuta ug giingong nawala.

Ang biktima gidala unta dayon sa Balamban District Hospital apan gideklarar nga dead on arrival.  (BANAT NEWS)