Pension sa mga retiradong atleta patas-an

CEBU, Philippines - Patas-an ang pension sa mga retiradong atleta sa nasud ug uban pang binipisyo niini kung palarang modaug pag-usab ang Pwersa ng Bayaning Atleta o PBA Party List sa umaabot piniliay.

Matud pa ni PBA Cong. Mark Aeron Sambar ang Party List Representative daghan sa mga retiradong atleta nga nakahatag og dakong dungog sa nasud apan wala nay igong kinitaan human kini miretiro o nahimong baldado na sa ilang tagsa-tagsa ka profession.

Busa  makatarunganon  lang alang  sa PBA  nga angay hatagan  ang  mga hingtungdan  og dugang lifetime pension.

Sa pagkakaron ang mga atleta sa nasud nga retirado na nagdawat   og ginagmay’ng pension depende sa matang sa paugnat sa kusog nga ilang giapilan.

Matud pa ni Cong. Sambar  nga  gusto  nilang himoong P20 mil matag bulan ang pension sa  maong  mga  retirado inig edad niini og 50 anyos pataas.

Usa sa gihimo  niyang  ehemplo mao si Z Gorres nga human siya  mahimong  kampiyon, nahimo  siyang  baldado  o  inutil  ug karon suportado sa PBA ug ila kining gihimo nga ika tulo nga nominee sa maong party list.

Gani  si Gorrez  mismo  ang  mipamatuod  nga dako ang natabang kaniya sa PBA ug gani karon bisan nga wala na siya sa natad sa pamoksing padayon gihapon ang iyang pagtudlo sa mga boksidor nga buot mosunod sa iyang tunob.

Gipadayag ni Cong. Zambar nga dili angayang masagmuyo ang katawhan sa kapildehan ni Manny Pacquiao, Brian Velloria ug Nonito Donaire,  ug   angayan nga  suportahan  sila aron makabaton sila  og  igong kaisog sa paglampos sa sunod niini nga mga away ibabaw sa ring. Gawas  kanila  angay  usab  nga  suportahan  ang mga batang atleta sa Palarong Pambansa, SEA games ug Olympic games nga kulang   sa suporta  gikan sa Philippine Sports Commission ug sa mga ahensiya sa paugnat sa kusog, sumala  ni Zambar.  (Bong Soriano/WC) (FREEMAN)