6 sa 13 nakaeskapong priso sa Sagay nadakpan
BACOLOD City, Philippines—Unom sa 13 ka mieskapo nga priso sa Sagay City District Jail sa Negros Occidental niadtong Miyerkules ang nadakpan pagbalik niadtong Biyernes ug kagahapon sumala pa sa kapolisan.
Matud pa ni Senior Supt. Ricardo dela Paz, acting Negros Occidental police director, ang upat nga nadakpan pag-usab kagahapon mao sila si Joemar Libester, 26, may kasong rape; Jimmy Vistar, 18, murder case; Joenard Quirante, 22, murder case; ug Jolito Subteniente, 26, murder case. Sila nadakpan sa Hacienda Balbina Brgy Rafaela sa Sagay City sa gihiusang mga sakop sa Sagay City police, 2nd MC, RPSB-6, 2nd PSP, PPSC, and 6th SAB, SAF personnel.
Samtang ang duha nadakpan pag-usab niadtong Biyernes sa usa ka bus terminal sa Cadiz City, Negros Occidental nga sila si Rolando Bajo Jr., 22, ug Jeck Española, 24, sumala pa ni Chief Insp. Gilbert Peremne, Bureau of Jail Management and Penology (BJMP) Region-6 spokesperson.
Ang trese nakaeskapo human gitionan og armas sa usa sa mga pugante ang mga jailguards. Dunay gitaganang P10,000 nga patong sa ulo alang sa subling pagkasikop sa nahibiling pito pa ka inmates nga nakaeskapo nga mao sila si Rey Villanueva, 28, Richard Dacal-Dacal, 28, Armando Dilao, 24, Gilbert Manija, 24, Marjon Bandala, 24, Eric Cordero, 18, ug Resty Dacal-Dacal, 22. (BANAT NEWS)
- Latest
