Nag-una sa LET pasidunggan sa Talisay
CEBU, Philippines - Ang kagamhanan sa dakbayan sa Talisay mohatag og pasidungog sa duha ka mga estudyante sa Talisay City College kinsa mipasar ug mi-top sa Licensure Examination for Teachers (LET) niadtong Marso 2013.
Kahinumduman nga si Junnalie Labajo Brago ug Angielo Labajo Pahamutang ang parehong mi-top 10 sa elementary ug secondary level sa pasulit.
Si Konsehal Dennis Basillote, chairman sa committee on education nagkanayon nga ang nahisgutang duha ka mga graduate nga mi-top sa LET angayan lang pasidunggan tungod kay naghatag sila og dungog sa ilang tunghaan.
Matud ni Basillote nga ika-limang higayon na kini nga ang TCC nabutang sa top.
Samtang si Kongresista Eduardo Gullas sa unang distrito sa probinsiya nagkanayon kini nga ang katawhan sa Talisay angayang magmapasigarbohon sa maong dungog.
Matud ni Gullas nga nalipay siya sa resulta sa pasulit diin nakawhat sa TCC ang dakung dungog ug nanghinaot siya nga makakuha og suporta ang planong paghimo sa TCC ngadto sa state university.
Si Gullas ang mipalabang og bill sa paghimo sa TCC ngadto sa state university ug ang maong bill naa na sa Senado. (BANAT BALITA)
- Latest
