CEBU, Philippines - Ang Department of Environment and Natural Resources (DENR-7) nga gipangunahan ni Regional Director Isabelo Montejo miawhag sa dul-an sa 500 ka mga magtutudlo sa chemistry, researchers, industry practitioners ug mga tinun-an sa tibuok nasud sa paghimo og epektibong panukdanan aron mokibra ang kahugaw sa kalikopan.
Atol sa gipahigayong ika -28 nga Philippine Chemistry Congress, gimanduan ni Montejo ang mga mitambong sa pag-umol og yano nga pamaagi sa paghinlo sa kalikopan pinaagi sa tampo sa katawhan.
Ang mga chemist dako kaayo og mahimo niini, sumala pa ni Montejo kansang pagsalig iyang gipiyal sa maong mga propesyonal.
Pinaagi sa tema nga "Chemistry in 3D: Discovering, Defining, Developing, ang gipahigayong Philippine Chemistry Congress nagpaabot og tampo gikan sa mga chemist sa nasud pinaagi sa epektibong sistema nga mugna sa ilang sayantipikanhong pamaagi aron masulbad ang kahugaw sa palibot sa nasud.
Matud ni Montejo nga ang kahugaw sa kalikopan gitambayayongan pagpabug-at sa mga nagkalainlaing industriya nga mihatag og panginabuhi sa tawo sama sa enerhiya, agrikultura ug uban pa.
Busa alang kaniya dako usab kaayo og papel ang katawhan pinaagi sa pag-edukar kanila niining maong lakang. (BANAT NEWS)