CEBU, Philippines - Gitugyan ngadto sa Cebu City Health Department (CCHD) ang pagpitol sa mga negosyante nga nagpa-uso niining automatic tubig machine (ATM) nga “peso-peso†apan way klaro.
Matud pa ni Regional Director Asuncion Anden sa Department of Health (DOH)7 nga angay kontrolahon sa CCHD ang maong mga patigayon nga naghatag og peligro sa panglawas sa publiko.
Sa Kapihan sa PIA nga nanukad didto sa buhatan sa DOH7 kagahapon sa buntag gibutyag ni Anden ang kapeligro sa tubig nga anaa sa mga aseras o sidewalk kansang tag-iya wa masuta kun diin mokuha sa maong tubig.
Matud pa ni Anden nga peligro kaayo karong panahona ang pag-inom og hugaw nga tubig sanglit nia dinhi magsukad ang mga sakit nga sama sa tipos, diarrhea, cholera, desenteriya ug uban pa nga sa higayong mataligam-an ug dili kadapatan dayon og tambal ang mabiktima, hayan nga makabsan kini sa kinabuhi.
Busa higpit niya nga gipasidan-an ang publiko gikan sa pagpatuyang og inom og tubig nga walay klaro sama niining mga peso-peso nga tubig gikan sa ATM. Ang engineering department sa DOH7 misugyot nga alang kanila mas maayong hingpit nga patak-opan ang maong matang sa patigayon tungod sa kapeligro niini ilabi na sa mga kabataan ug mga estudyante.
Karong panahon nga ting-init ug dali kaayong uhawon ang tanan ilabi na ang mga kabataan ug mga estudyante nga wala masayud sa matang sa tubig nga ilang imnon, dali kaayong mosawod og tubig gikan sa peso-peso nga ATM.
Miingon si Anden nga kadtong mga ATM nga may klarong address ang mga tag-iya mao ray gitugotan sa CCDH nga makapabarug og ATM bisan asang dapita.
Apan naglabi kadaghan ang mga way klaro nga ATM nga kun malanag ug mahilo sa tubig niini ang moinom, walay mapangitaan ug walay ikasumbong ngadto sa mga otoridad.
Ang pagdagsang sa ATM nga peso-peso mikuyanap na karon sa nagkalainlaing lugar sa mga sidewalk sa dakbayan sa Sugbo nga kun kabuangan kini sa mga terorista pagbutang og hilo segurado nga di tiaw ang gidaghanon sa mabiktima niini. (BANAT NEWS)