CEBU, Philippines - Kalisang ug kaguol maoy mihabol sa galamhan sa mga runners ug sa mga audience dihang gibombahan sa wala pa mailhing mga gidudahang terorista ang tinuig nga Boston Marathon kagahapon didto sa Boston.
Sa taho sa Associated Press, duha ka kusog nga buto ang miulbo samtang hinay-hinay nga nangabot nga mga runners sa finish line.
Ang maong pagpamomba miresulta sa kamatayon sa tulo ka mga tawo, lakip na niini ang 8-anyos nga bata.
Sa kasamtangan, anaa na sa dul-an 120 ang mga nalista nga na-injured, pipila niini mga audience nga mitan-aw sa maong sikat nga international marathon.
Dali usab nga mihatag sa iyang mensahe si United States of America President Barack Obama kinsa mikondena sa maong pagpamomba nga gihulagway nga usa sa labing ngil-ad ug kuyaw nga bombing sunod sa ‘Twin Tower bombing’ niadtong Septiyembre 11, 2001.
Sa iyang bahin, ang Filipino runner ug triathlete nga si Arland Macasieb mitaho nga walay Filipino nga naangol sa maong insidente.
Sa laing bahin, napugos si NBA Commissioner David Stern sa pagkanselar sa gitakda untang duwa tali sa Boston Celtics ug Indiana Pacers kagahapon didto sa TD Garden sa Boston, Massachusetts tungod sa maong pag-atake. (Lemuel Maglinte ug report gikan sa wires/EIM)(BANAT NEWS)