Ulo sa umagad gitigbas sa ugangan

CEBU, Philippines - Samdan  sa ulo ang usa ka umagad human kini tigbasa  sa iyang ugangan didto sa Sitio Progress, Brgy. Gun-ob dakbayan sa Lapulapu sa milabay’ng gabii. Ang biktima mao si Mark Anthony Valliente Tito, 21,ulitawo apan adunay kapuyo  ug nagpuyo sa maong dapit.

Samtang ang nanigbas mao si Paulo Tumulak, 40, ulitawo   ug  uyoan sa kapuyo sa biktima.

Sa pasiunang imbestigasyon ni PO1 Jomar Florentino nasayran nga   sa sayo pa,  nag-inom   ang  biktima   ug  ang  suspek  uban sa ilang mga silingan ug   human  makayarok  og  pila  ka  baso  miuli  ang  biktima  sa ilang  balay  apan  gisugat  kini  og lalis  sa iyang  kapuyo.

Aron sa paglikay sa kagubot milakaw   kuno si Tito, apan   nasugatan  niini   ang suspek ,  kinsa  sa  wala’y  igong  hinungdan  mihapos  sa iyang  pinuti  ngadto sa biktima.

Gumikan  kay  walay  panagang hapit  mapikas  ang  ulo  sa  biktima  hinungdan  nga  gihatud  dayon  kini  ngadto  sa Lapulapu City  Hospital. Samtang si Tumulak dali nga nakabiya sa maong dapit   ug  padayon  nga  gipangita  sa kapolisan.

Nagduda ang kapolisan nga nagpalaban ang kapuyo sa  biktima  ngadto  sa suspek   hinungdan   sa kasuko   sa naulahi.

Kasong frustrated murder ang posibling  ipasaka sa kapolisan batok ni Tumulak. (BANAT NEWS)