CEBU, Philippines - Kritikal ang kondisyon sa usa ka construction worker human kini pusila didto sa Purok Thunder, Sitio Timpolok Brgy. Babag dakbayan sa Lapulapu sa milabay’ng gabii.
Ang biktima mao si Roberto Villamor Ymbong, 40, minyo, nagpuyo sa maong dapit, ug usa ka construction worker.
Ang namusil nailhan usab nga si Carlos Lumongsod Tampus alyas “Mologâ€, 40, ulitawo, ug molupyo usab sa maong dapit. Sa pasiunang imbestigasyon ni SPO1 Allan Pantalleon ug PO1 Jomar Florentino sa kapolisan sa maong dakbayan nasayran nga naglakaw sa ngitngit nga dalan si Ymbong uban sa iyang mga higala dihang miabot si Tampus ug kalit lang namusil.
Nag-iyahay og panagan ang grupo apan si Ymbong maoy naigo sa tiyan. Gihatud dayon kini ngadto sa Lapulapu City Hospital apan gibalhin dayon ngadto sa Vicente Sotto Memorial Medical Center sa dakbayan sa Sugbo ubos sa talandugong kahimtang.
Samtang si Tampus dali kaayong miikyas ug gipangita pa sa kapolisan.
Wala pa hisayri sa kapolisan ang motibo sa maong pagpamusil ni Tumulak ngadto ni Ymbong.
Kasong frustrated murder ang ipasakang kaso sa kapolisan batok ni Tampus. (BANAT NEWS)