CEBU, Philippines - Anak sa kanhi bise-gobernador sa Sugbo ug kauban gipadakop sa iyang igsuong si Gricelda Sanchez-Zaballero tungod sa giingong pagkawat sa ilang yati. Ang gipadakop mao sila si Leodegreco Sanchez alyas Greco ug higala niining si Eduard Teves nga molupyo sa dakbayan sa Mandaue.
Ang Regional Special Operation Group (RSOG) pinanguluhan ni Chief Insp. George Ylanan, nakadawat og reklamo gikan ni Zaballero nga pugsanong gikuha sa mga armadong lalaki nga luwan sa usa ka awto ang ilang yati diha sa barangay Catarman, sa Liloan ug gidala kini sa Cebu City.
Ang kapolisan nakadawat og report nga nasigpatan ang maong sakyanan diha sa dalan Tres Borces sa Sindulan sa barangay Mabolo sa siyudad sa Sugbo.
Matud pa nga naaktuhan ang duha sud sa usa ka panimalay nga naghikyad og drug paraphernalia nga makita ra diha sa gawas tungod kay abli ang pultahan niini.
Tungod niini daling gisulod sa kapolisan ang maong panimalay ug nadakpan ang managhigala, matud pa nakuhaan si Greco og usa ka bulto nga gituohang shabu samtang usa ka gamay nga pakete usab gikan ni Teves.
Si Greco sa iyang bahin, dihang nahinabi mipadayag kini nga unsaon niya pagkawat ang usa ka butang nga usa siya sa tag-iya.
Gisaysay kini ni Greco nga dihang nabuhi pa ang iyang amahan, ang maong yati gibilin ngadto kanilang mga anak.
“How can I be accused of something that I also owned…..dili ko komportable nga moingon ko nga gikuha nako kay tag-iya man sad ko….just like, di ko matingala nga mosud ko sa Bantay Radio mosud ko sa among opisina, dili man ko mahug nga gatecrasher ug unsa man gani. Bisan og tuwad-tuwalihon na kay usa man sad ko sa tag-iya,†pasabot pa ni Greco.
“Buntag sayo akong kawaton ang yati? Kadako anang yati, kun gikawat pa na nako nganong mananghid pa man ko sa kapitan. Unsaon man nako pagkawat sa butang nga akoa sad?†matud pa ni Greco.
Gihulagway ni Greco nga usa ka harassment ang gihimo sa iyang magulang ug giingong gigamit niini ang iyang gahom kay suod kini sa mga politiko. Matud pa ni Greco nga hilabihan nga kahiubos ang iyang gibati sa iyang igsuon tungod sa gibuhat niini kaniya.
Samtang gihimakak usab ni Greco ang nakuhang gituohang shabu sa ilang mga kamot uban sa iyang higala.
Ang kapolisan miingon nga nakuhaan nila og usa ka dakong pakete sa gituohang shabu ug usa ka gamay’ng pakete ug mga paraphernalia.
Kasamtangan una nga gitanggong sa karsel sa Police Regional Office ang duha ka dinakpan samtang nagpaabot og tukmang kaso batok kanila. (BANAT NEWS)