Flyover sa Gorordo Ave. ipatukod ni Osmeña

CEBU, Philippines - Si Kongresista Tomas R. Osmeña mitug-an nga kun modaug siya pag-usab pagka- mayor sa dakbayan ipadayon niya pagduso ang tinguha niya nga matukoran og flyover ang eskena Gorordo Avenue ug Sudlon sa Barangay Lahug.

Apan hinuon matud ni Osmeña nga kun ang kinabag-ang katawhan supak nga matukoran og flyover ang maong lugar dili usab siya mamugos pagpatuman sa iyang tinguha.

Gibutyag  ni Osmeña nga kun ang mobabag sa katukoran sa flyover mao ra ang mga magpapatigayon hayan nga dili niya kini hatagan og bili.

Ang kongresista sa south district kinsa nagtinguha nga mahimo pag-usab nga mayor sa dakbayan miingon nga dili makaayo sa negosyo kun mograbe na ang problema sa trapiko sa usa ka dapit.

Ang gipanagan-an ni Osmeña mao nga pipila ka tuig gikan karon mograbe pa gayud ang problema sa trapiko sa Gorordo Avenue tungod sa mga sakyanan nga moliko diha sa eskena Sudlon ug Gorordo Avenue.

Ang City Traffic Operations Management (CITOM) mihimo’g lakang nga gikan sa alas  6:00 ngadto sa alas 8:00 sa buntag dili tugotan ang mga sakyanan nga gikan sa Sudlon nga maka-left turn paingon sa JY Square.

Kini maoy rason nga ang mga motorista mapugos sa pagdemano apan sanglit walay U-turn slots nga para kanila mopugos gihapon sila sa pagliko inig-abot sa unahan nga susama ra ang epekto.

Gisugyot unta ni Osmeña nga matukoran og flyover ang maong dapit ug nakakita na siya’g pundo nga magamit gikan sa DPWH apan ang grupo nga Livable Cebu   maoy  dakong supak.

Matud ni Osmeña nga ang flyover napamatud-an na nga makasulbad sa problema sa trapiko kay dili na kinahanglang mohunong ang mga sakyanan inig-abot niini sa eskena. /–WC (BANAT NEWS)