LTO mopatuman sa balaod–Aguilos

CEBU, Philippines - Ang Land Transportation Office (LTO) igo lang mipatuman sa balaod matud ni LTO director Raul Aguilus.

Ang maong pamahayag ni Aguilus mitumaw kini human ang ubang mga drayber sa pampublikong sakyanan mireklamo kabahin sa kataas sa adlaw sa suspension sa ilang mga lisensiya kung duna silay mahimong kalapasan sa trapiko.

Matud sa mga drayber nga ang maong sitwasyon makahatag kini og dugang kalisud sa ilang kahimtang diin bisan gani sulod lang sa tulo ka adlaw nga masuspenso giingong magutom na ang ilang mga pamilya niini.

Si Aguilus nga nahinabi sa Banat News kagahapon nagkanayon nga igo lang silang mipatuman sa balaod tungod kay kung dili nila ipatuman ang balaod sila usab ang mabweltahan o masugapa sa kaso. Matud niya nga malipay silang walay mga drayber nga masikop apan hangtud nga dunay mga drayber nga magpabadlong ug dili motuman sa balaod sa trapiko padayon usab silang mopahigayon sa ilang trabaho.

Matag adlaw 100 ngadto sa 200 ka mga drayber nganhi sa Metro Cebu ang masikop nga dunay kalapasan sa trapiko ug gibana-banang 40 porsyento niini mga PUJ samtang 30 porsyento mga bus ug ang sobrang porsyento gilangkuban kini sa mga motorsiklo ug taxi.

Kasagarang kalapasan nga mahimo sa mga drayber mao ang disregarding traffic signs, no stopping, no U-turn ug no left turn.

Ang multa sa mga kalapasan sa trapiko gikan sa P1,000 ngadto sa P5,000 apan ang mga drayber pwede silang mosumitir og motion for reconsideration aron dili matanggong og dugay ang ilang lisensiya.

Hinuon susihon una sa LTO kung dili ba habitual o kanunay ang ilang nahimong kalapasan ug kung habitual kini nilang nahimo i-deny sa LTO ang mao nilang motion. (Brenda D. Batuto) (BANAT NEWS)