Rerouting sa PUJ sa Mandaue gipalibkas

CEBU, Philippines - Gilibkas na sa buhatan sa Traffic Enforcement Agency of Mandaue (TEAM) ang gipatuman nga re-routing  sa mga PUJ nga nagbiyahian sa dakbayan sa Lapulapu ug dakbayan sa Sugbo nga mosubay sa dalan A.S. Fortuna ug mosulod sa terminal sa J.Centre Mall  lahos  sa dalan Albano ug mopaingon sa dalan M.L. Quezon sa barangay Maguikay.

Ang TEAM executive officer nga si Edwin Ermac nga nahinabi sa Banat News  miingon nga nasumiter na nila ngadto sa traffic board ang resulta sa dry run nga ilang gihimo.

Matud pa niya nga natapos na ang 60 ka adlaw nga re-routing scheme nga ilang gihimo sukad sa bulan pa sa Pebrero niining tuiga apan sa gihapon ilang gipasagdan ang mga drayber sa PUJ nga gustong mopadayon sa pagsubay sa dalan nga nalakip sa re-routing scheme nga ilang gipasiugdahan.

Gitataw niya nga nabahin gayud hinuon ang baroganan sa mga drayber sa pagtuman  sa re-routing nga ilang gipatuman sanglit adunay nakauyon apan ang pipila mipadayag usab sa ilang pagsupak.

Dugang pa ni Ermac nga kasamtangan  niyang gipaabot nga ang chairman sa committee on transportation sa konseho sa dakbayan mopatawag  og public hearing aron mahibaw-an kun mapatuman ba o dili ang re-routing scheme nga ilang gisugyot.

Gipasabot ni Ermac nga nag-unang hinungdan sa pagpatuman sa dry run alang sa traffic scheme  mao ang dako niyang tinguha nga mabungkag ang sindikato sa mga dispatcher  nga magtukod og ilegal nga terminal sa daplin sa kadalanan nga labing makabara  sa  dagan  sa trapiko. (BANAT NEWS)