Mga Muslim papahawaon

CEBU, Philippines - Dili gusto si Mayor Michael Rama nga malangan ang pagtukod sa building nga himoong Ermita Elementary School mao nga dili kaayo siya ganahan nga lugwayan pa ang pag-estar sa mga nagpuyo sa napalit nga yuta sa dakbayan.

Matud ni Rama nga dugay ra kaayo nga ang dakbayan sa Sugbo nagtinguha nga makapatukod og tunghaan sa Ermita kay pagka karon ang kabataan sa mao nga barangay molakaw pa og layo aron maka-eskwela sa Cebu City Central School.

Ang dakbayan sa Sugbo nakapalit na og luna sa Barangay Ermita aron tukoran   og school building pinaagi sa kwarta gikan sa Cebu City School Board, apan dili pa kini mahimo kay duna pay nagpuyo sa building nga nag-ukopar sa luna.

Si Alberto Manda ang tag-iya sa maong building nga giukopahan karon sa mga sakop sa Carbon Muslim Brotherhood Inc. wala na mangolekta og abang gikan sa miestar   niini  ug gimandoan na sila nga mopahawa sa dili pa molapas ang Abril 15.

Ang mga tawo nga nag-abang sa building nga iya ni Manda nag-ambahan kagahapon didto sa City Hall atol sa sesyon sa konseho sa dakbayan ug nagpatabang kang Konsehal Alvin Dizon, tsirman sa City Council’s committee on housing.

Matud ni Dizon nga angay lang nga mohimo usa og konsultasyon ang Office of the Mayor sa dili pa palayason ang mga nagpuyo sa building.

Apan si Mayor Michael Rama miingon nga dugay ra sila nga nakahimo og konsultasyon sa mga hingtungdang lumulopyo.

Ang Notice of Eviction nga gipirmahan ni Kapitan Antonieto Flores nagkanayon nga kun dili mobalhin ang maong mga nag-abang sa building, ang City Hall maoy mangunay sa pagguba sa building. (BANAT NEWS)