CEBU, Philippines - Mipakita sa ilang kahanas ang mga sakop sa 7th Police Center for Aviation Security (PCAS-7) pinaagi sa usa ka "Aircraft Counter-Hijacking Exercise" kagahapon sa buntag diha sa Mactan Cebu International Aiport (MCIA).
Atol sa maong pagbansaybansay si PNP AVSEGroup, Director P/CSUPT. Jesus Gordon Descanzo, CESE uban sa bag-ong na-promote nga si 7PCAS Chief, P/SSupt. Ritchie Medardo Posadas maoy nangunay sa pagsaksi niini sa "hijacking scenario."
Gipakita sa maong exercise kung unsaon pagluwas ang mga pasahero nga nabiktima sa upat ka mga hijackers luwan sa Phil-Asean Airways gikan sa Mindanao ug sa pagkadiskobre sa bomba nga gisud sa cargo compartment sa maong eroplano.
Giangkon ni Descanzo nga daghan pa sila og kakulangon sa kahimanan alang sa maong operasyon ug mga kagamitan sa iyang mga sakop nga maoy unang moresponde sa maong alarma. Apan bisan pa niini maayo ang gipakitang koordinasyon sa mga operatiba aron magmalampuson kini sa ilang pagluwas sa “200†ka mga Most Important Persons (MIP) nga mga pasahero sa maong eroplano.
Plano karon ni Descanzo nga mohulma og kaugalingong “special action force†ang PCAS nga maoy mosakbang sa pagresponde sa maong alarma.
Samtang si Posadas sa iyang bahin naglaraw usab nga mo-coordinate sa Special Weapons and Tactics sa kapolisan sa dakbayan sa Lapulapu; Phil. Air Force, Airport Police SWAT alang sa pagbansaybansay sa counter- hijacking sa iyang mga sakop.
Gihangop hinuon ni LCPO director Sr. Supt. Rey Lyndon Lawas sa maong tinguha. (BANAT NEWS)