Magkaatbang nga kandidato sa Cordova nagkahiusa

CEBU, Philippines - Gipasalig sa magkaatbang nga mga kandidato  sa lungsod sa Cordova  nga  ipatigbabaw nila ang kahapsay ug kalinaw sa umaabot nga piniliay ug andam nilang tumanon ang mga lagda nga gipatuman sa Commission on Elections (COMELEC).

Si Bise Mayor Eduardo Jumao-as nga kaatbang nga kandidato sa pagka mayor ni Mayor Adelino Sitoy  mihimo  sa maong  pasalig  sa ilang  panagtagbo  ug  pagpinirmahay  og covenant nga gipahigayon didto sa San Roque Parish Hall sa maong lungsod  sa miaging  adlaw.

Ang maong covenant   gipasiugdahan ni Chief Inspector Alvin Balio, hepe sa kapolisan sa maong lungsod, uban  ni Father Roman Alaan, kura paruko sa San Roque Parish Church  ug Arvin Maghanoy nga maoy Comelec  registrar sa  Cordova.

Ang laing kandidato sa pagka-mayor sa maong lungsod nga si Johnson Tan lakip usab sa mipirma sa maong kasabotan ug mipasalig  sa  iyang mga kaatbang nga dili kini mohimo og kalihokan nga makalapas sa lagda nga gipatuman sa Comelec.

“We don’t hold grudges against each other because we are all after for the welfare of Cordova,” nagkanayon si Jumao-as sa iyang pamahayag.

Hinuon gipadayag  ni Tan ang iyang kasagmuyo sa kapolisan tungod kay napakyas  kini sa pagdakop sa armadong lalaki nga kalit lang misulod sa iyang panimalay niadtong miaging bulan.

“I hope the police would go after the armed person and arrest violator’s,” nagkanayon si Tan sa iyang pamahayag.

Samtang si  Maghanoy nga maoy Comelec registrar sa maong lungsod   milaum  nga ang tulo ka mga nagkaatbang nga kandidato sa umaabot nga piniliay magtinabangay sa usa’g-usa alang sa  limpiyo ug malinawon nga piniliay  sa umaabot  nga Mayo 13. (BANAT NEWS)