Lihok ni Joavan gibantayan sa kapolisan

CEBU, Philippines - Ang officer-in-charge sa Talisay City Police Station nga si Superintendent Elmer Lim nagkanayon nga dili nila i-personalize ang anak ni Mayor Socrates Fernandez nga si Joavan Fernandez.

Human sa laing kontrobersiya nga nalambigitan ni Joavan diin gipasanginlan kining nagluklok og pistola niadtong milabay’ng adlaw sa usa sa mga residente diha sa sitio Kawayanan, barangay Lagtang ang hepe sa kapolisan sa probinsiya miluwat og kamanduan ni Lim nga ipa-monitor ug ipa-neutralize si Joavan tungod kay giingong makonsiderar kining hulga sa eleksiyon.

Si Florita Echavez Rosas kinsa maoy mipasangil kang Joavan ug nagpa-blotter ngadto sa TCPS apan niadtong milabay’ng adlaw mibalik kini sa police station ug namalibad nga dili siya mopasaka og kaso batok kang Joavan.

Si Lim nga nahinabi sa mga tigbalita kagahapon mibutyag kini nga giingong si Rosas wala hulgaa ni Joavan apan ang pagluklok og pusil ni Joavan makahatag kini og kahadlok ilabi na ngadto sa mga ordinaryong sibilyan.

Apan giklaro ni Lim nga dili nila i-personalize si Joavan o mao lang ang ilang tutokan ang ilang operasyon general kini o alang sa tanan nga nakahimo og kalapasan sa balaod.

Matud sa OIC nga duna na sila’y mga nasikop nga nakalapas sa Comelec gun ban ug kung maaktohan nila si Joavan nga dunay nahimong kalapasan sama sa ubang mga suspetsado ilaha usab kining sikupon.

Si Lim midugang igo lang silang mopatuman sa balaod ug sa ilang trabaho isip tinugyanan sa balaod. (BANAT NEWS)