Duha ka armadong lalaki nadakpan
CEBU, Philippines - Duha ka armadong lalaki nga giingong nagdala-dala og armas ang nasikop diha sa barangay San Roque pasado alas-11 sa miaging gabii.
Ang mga nasikop mao sila si Marvin Tuburan, 25, ug Jordan Tortor, 22, ang giingong nagbitbit sa iyang tagsa-tagsa ka armas nga kalibre .38 rebolber.
Matud pa sa hepe sa kapolisan sa Waterfront Police Chief Insp. Wildemar Tiu nga nakadawat sila og report gikan sa usa ka concerned citizen kalabot sa duha ka dinakpan nga nagdala-dala og armas.
Uban sa mga sakop sa Special Weapons and Tactics ilang nasikop ang duha ug kompirmado kining naghupot og armas apan walay napakitang mga legal nga papeles sa paghupot niini.
Dugang pa ni Tiu nga ang duha pulos nangangkong pang-self defense ra nila ang maong mga armas.
Susihon usab ni Tiu ang background sa duha kun nalambigit ba sila sa mga krimen sa siyudad. (BANAT NEWS)
- Latest
