CEBU, Philippines - Patay ang usa ka 17-anyos nga bayong-bayong human kini napusilan sa usa ka opisyal sa kapolisan nga amahan sa iyang uyab sa kagahapon sa hapon diha sa barangay Guadalupe, dakbayan sa Bogo.
Ang biktima mao si Vincent Paul Montesclaros, residente sa maong dapit kinsa nakaangkon og samad pinusilan sa iyang ulo ug dughan wala na makaabot pang buhi sa Cebu Provincial Hospital sa dakbayan sa Bogo.
Ang suspetsado mao si Chief Inspector Ceferino Tabay Jr., deputy sa Bogo City Police Station.
Si Supt. Anthony Bagarinao, hepe sa Bogo City Police Station nga nahinabi sa Banat News nagkanayon nga si Tabay “on duty†nianang tungora apan midalikyat og pauli sa ilang balay ug nakita ang iyang anak nga babaye usa usab ka menor de edad diha sa usa ka payag sa eskwelahan duol sa ilang balay nga nagkadugo ang ilong uban sa biktima.
Giingong ang biktima ug anak ni Tabay manag-uyab sumala pa ni Bagarinao.
Midugang si Bagarinao nga base sa alegasyon giingong adunay gisuwayan og hulbot gikan sa iyang hawak ang biktima ug sa kabalaka nga armas kini giunhan na kini og pusil ni Tabay.
Hinuon matud ni Bagarinao nga mopahigayon pa sila og dugang pang imbestigasyon sa hitabo ug gisubay usab nila karon ang mga nakasaksi sa insidente.
Si Tabay giaresto sa iyang mga kauban ug gidisarmahan na kini. (/EIM) (BANAT NEWS)