CEBU, Philippines - Patay nang nadangat sa tambalanan ang usa ka drayber sa habal-habal human madasmagi og sakyanan ang motorsiklo nga iyang gimaneho sa highway sa barangay Corazon sa lungsod sa Catmon niadtong Miyerkules sa gabii.
Ang biktima nga nagmaneho sa motorsiklo giila nga si Abner Montemayor, taga barangay San Jose Catmon.
Samtang ang sakyanan nga nakadasmag kaniya mao ang Ford Everest (AUV) nga gimaneho ni Marlon Monterola, 35, molupyo sa barangay Talisay sa lungsod sa Daanbantayan.
Matud ni PO1 Virselito Debulosan sa Catmon Police Station dihang nahinabi sa Banat News subay sa imbestigasyon padung sa norte si Monterola dihang kalit nga migawas gikan sa usa ka gamay nga dalan ang biktima.
Tungod sa kakalit nga pagbutho ni Montemayor uwahi nang nakabantay si Monterola hinungdan sa pagkapunggit niini.
Dali hinoon nga gitabang ang biktima ug gihatud sa Juan Dosado Memorial Medical Center sa lungsod sa Sogod apan gideklarar nga dead on arrival kon DOA sa mga doktor.
Ang drayber natanggong karun sa karsel sa kapulisan samtang gihikay ang tukmang sumbong nga ipasaka batok niya.
Sa laing aksidente sa dalan, talandugon ang usa ka 4-anyos nga bata human nadasmagan og motorsiklo sa paglabang niini sa dalan sa barangay Tapon sa lungsod sa Dumanjug niadtong Miyerkules sa alas 5:00 sa hapon.
Ang biktima mao si Reynaldo Sumalinog, molupyo sa nahisgutang lugar samtang gidakop ang drayber sa motor nga si Marciano Antifuesto, 28, taga barangay Masa, Dumanjug.
Matud ni PO2 Ramon Chinel sa Dumanjug Police dihang nahinabi sa Banat News nagduwa daplin sa karsada ang bata apan kalit kining mitabok ug naatol sa pag-agi ni Antifuesto.
Ang bata gidala sa Barili District Hospital apan gibalhin kini sa Vicente Sotto Memorial Medical Center tungod sa kagrabe sa kadaot nga nahiaguman sa iyang lawas. (BANAT NEWS)