CEBU, Philippines - Ang grupo sa Alayon Party sa dakbayan sa Talisay wala makaabot sa P10,000 ang gasto sa ilang gipahigayong proclamation rally ug caravan niadtong Domingo.
Samtang ang kaatbang nilang partido nga Liberal Party kinsa nagpahigayon usab og proclamation rally ug caravan niadtong Domingo mokabat sa P15,000 ang gasto.
Kahinumduman nga usa sa rules karon sa Comelec ang pagsumitir sa mga partido o kandidato sa ilang statement of expenditures kung duna silay ipahigayong rally.
Si Richel Bacaltos, campaign manager sa Alayon mibutyag kini nga P8,230 lang ang nagasto sa ilang grupo sa pagbukas sa ilang pagpangampaniya lakip na niini ang caravan ug rally nga gipahigayon sa barangay Tanke.
Base sa statement of expenses sa Alayon migasto sila og P4,000 alang sa sound system, P1,500 nga gasolina alang sa tulo ka mga sakyanan ug P2,730 alang sa mga balon ug drum and bugle corps.
Sa wala pa ang motorkada niadtong Domingo sa buntag ang grupo Alayon mitambong kini og misa diha sa Santa Teresa de Avila sa barangay Poblacion sa alas 8:00 sa buntag.
Samtang ang grupo sa LP sa alas 6:30 sa buntag mitambong usab kini og misa diha sa Saint Joseph Parish sa barangay Tabunok dayon nagpahigayon usab sila og motorkada.
Sa kabahin sa LP, mikabat ngadto sa P12,500 ang gasto sa ilang gipahigayong rally diha sa atubangan sa city hall.
Si Charlene dela Cuesta, secretary sa LP-Talisay nagkanayon kini nga ang maong gasto gilangkuban kini sa P6,000 nga bayad sa drum and bugle corps, P4,500 sa sound system, P1,000 alang sa snacks sa mga tanod ug P1,000 alang sa kuryente.
Ang maong statement of expenditures sa LP gikatakda pa kining isubmitir nila kagahapon sa hapon ngadto sa Comelec. (BANAT NEWS)