CEBU, Philippines - Samtang nabanhaw si Kristo niadtong Domingo, namatay usab kay nalumos ang usa ka welder nga naligo sa Vaño Beach Resort sa barangay Marigondon, sa alas 2:00 sa hapon sa maong adlaw.
Si SPO1 Allan Pantaleon sa homicide section sa kapolisan sa maong dakbayan miila sa namatay nga mao si Ruel Casquejo, 44 , minyo, nagtrabaho isip welder ug nagpuyo sa barangay Umapad, dakbayan sa Mandaue.
Matud pa ni SPO1 Pantaleon nga sa iyang pakisusi nga gihimo iyang nasayran nga kuyog sa biktima ang sakop niini sa pamilya ug mga silingan sa pagpangaligo sa maong resort.
Dugang pa niya nga sa wala pa malumos si Casquejo namatikdan kini nga malipayon nga nakigsawo sa pagpangaon sa paniudto uban sa iyang sakop sa pamilya ug mga silingan ug human sa pagkaon sa paniudto , miyarok og pipila ka baso sa ilimnong makahubog nga gitagay kaniya , dayon nananghid nga mouna sa pagtugsaw sa dagat.
Si SPO1 Pantaleon miingon nga samtang nalingaw ang tanang kauban ni Casquejo sa ilang panagkukabildo nahingangha na lang ang tanan dihang pipila nga nangaligo sa dagat sa maong lugar nagkaguliyang gumikan sa usa ka tawo nga milutaw sa ilang palibot.
Dihang ilang gisusi , nasuta nga si Casquejo ang maong tawo busa gisakwat kini dayon nila ug gihatud ngadto sa Mactan Doctor’s Hospital pinaagi sa ambulansya sa Rescue Unit Foundation (ERUF) apan gideklarar kini nga patay na sa pag-abot didto sa maong tambalanan.
Si SPO1 Pantaleon miingon nga iyang gitambagan ang sakop sa pamilya ni Casquejo nga ipaubos kini sa autopsiya sa pagtino kun wala bay foul play ang kamatayon niini. (/WC) (BANAT NEWS)