CEBU, Philippines - Patay nang napalgan sa iyang pamilya ang 21-anyos nga ulitawo nga nabulit sa samad pinusilan ang tibuok lawas diha sa gikatulgan niini sa iyang payag sa barangay Salagmaya sa lungsod sa Alcantara alas 9:00 sa buntag niadtong Domingo.
Ang biktima mao si Reno Remotigue, nagpuyo sa maong lugar samtang wala pa matino sa kapolisan kun si kinsa ang mamumuno sa biktima.
Subay sa imbestigasyon ni SPO3 Brendo Joel Beriarmente sa Alcantara Police Station sayo nga natulog ang biktima nga nag-inusara.
Gituohang gisaka kini sa wala mailhing tawo ug gipusil sa makadaghang higayon.
Ang igsuong babaye sa biktima nga si Marissa mao nay nakadiskobri sa patay’ng lawas human gipugos niya og abli ang pultahan tungod kay wala kini mangabli bisan sa iyang pagsangpit.
Onse ka basiyo sa bala sa kalibre .45 ug tulo ka deformed slug ang nakuha diha sa crime scene. Ang kapulisan padayon pang nihimo og lawom nga imbestigasyon sa maong panghitabu pag-ila ug pagtino kun si kinsa ang suspek sanglit walay dautang record ang biktima sa buhatan sa kapulisan. (EIM) (BANAT NEWS)