Naligo sa Biyernes Santo namatay

CEBU, Philippines - Namatay  ang 10 anyos nga bata  human  kini  maligo  kuyog  sa barkada didto  sa sapa  sa Udlom  sa  barangay  Magdugo, dakbayan  sa Toledo niadtong  Biyernes  Santo  sa alas 2:30  sa hapon.

Ang  biktima  nailhan  nga si  Hans Cabahug Cahogson, 10, ug nagpuyo sa Sityo Bawod, barangay Magdugo, sa maong  dakbayan.

Si SPO4 Carmilito Hornales, desk officer sa Toledo City Police   Station  mibutyag  sa Banat News  nga ang biktima  nananghid sa iyang ginikanan nga mokuyog  sa iyang  mga  barkada sa pangaligo  sa maong  higayon.

  Apan samtang nalingaw na sila og pangaligo sa  sapa  sa Udlom , ang biktima kalit lang   nawagtang   hinungdan nga   nagtinabangay  sa pagpangita  kaniya  ang  iyang mga kauban.

Pinaagi sa tabang sa mga tawo sa maong lugar nakit-an ang bikima nga wala  nay panimuot  ilawom sa tubig.

Gidali nila   kini  paghatud  ngadto   sa Toledo City District Hospital apan gideklarar  kini sa mga doctor nga dead on arrival ( DOA).

Ang kapolisan misalikway sa  katahap  nga adunay foul play ang maong panghitabo ug kombinsido nga pagkalumos  ang hinungdan  sa kamatayon  sa biktima.  (BANAT NEWS)