Dili fiesta sa Bantayan ang Semana Santa

CEBU, Philippines - Maayong Huwebes Santo kanatong tanan labi na sa mga Katoliko nga naghandom karon sa Semana Santa. Dili ikalimod basta  Semana Santa gani ang hisgutan motumaw dayon ang akong yutang natawhan sa Isla sa Bantayan kay pwerteng daghana’g tawo panahon sa Huwebes ug Biyernes Santo.

Usa sa mga rason nganong daghang tawo tungod sa life size nga mga imahen sa mga santos nga i-prosisyon inig Huwebes ug Biyernes sa gabii. Gani hangtod karon daghan gihapon ang moingon nga fiesta kini sa Isla sa Bantayan, bisan gani ang mga kaubanan nako sa media mosaway pa tungod kay ngano kunong gitunong sa mahal nga adlaw ang fiesta sa Bantayan.

Isip Bantayanon ako lang ipasabot nga dili gyod intawon ni fiesta sa Bantayan kining panahon sa  Semana Santa. Sa dihang nagtubo pa ko ug nanimuyo ko sa Isla sa Bantayan ako man ganing masabot nga kaming Bantayanon maoy pinaka-observant sa Semana Santa kay Miyerkules Santo pa lang kaming mga mananagat dili na managat kay magsugod nami’g puasa kay ang Ginoo hapit na mamatay unya hapit tanang sakop sa pamilya moadto gyod sa lungsod aron managkot sa simbahan ug moapil gyod sa prosisyon inig Huwebes ug Biyernes.

Mao ni usa sa mga rason nga wala nay baligyang isda sa merkado kay kaming mga mananagat dili man mopalawod ug mapugos na lang kami sa pag-ihaw og manok o kaha baboy aron himuong sud-an labi na kun duna kay mga bisita gikan sa laing mga lugar.

Tungod sa maong sitwasyon napugos ang kadagkoan sa simbahan sa Saint Peter and Paul paghangyo sa Archdiocese of Cebu nga hatagan og pabor nga makakaon og karne ang taga isla kay wala nay laing isud-an. Giuyonan usab kini sa Santo Papa hangtod nga karon nahimo nang praktis namong taga isla nga dunay inasal tungod kay daghan man sad ang mga turista nga moadto.

Hinaut nga masabtan kini sa tanan nga dili fiesta sa Bantayan ang Semana Santa, nahimo lang kining alegre kay dunay uban nga mihimo niini maong kalihukan nga komersyalismo. Ang tinuoray gyud nga fiesta sa Bantayan himuon matag Hunyo 27, 28 ug 29 pero mas daghan ang mga Bantayanon nga moadto sa lungsod sa matag mahal nga adlaw kay ang uban dunay mga saaran ug mga pahinungod.

Kini ang usa sa rason nga mas daghang tawo nga maghugop sa lungsod unya dugangan pa sa mga bongga nga mga karo nga dunay mga lifesize nga mga imahen nga i-prosesyon nga maghatag gyud og pagtagad sa mga tawo labi na sa mga turista.

Pasensya na sa mga nagpadala sa ilang mga reklamo nga sunod na lang nato nga isyu ipagawas ang inyong gipadangat nga text messages kay ako lang gipunting ang isyu bahin sa Semana Santa sa Isla sa Bantayan ubos ang pamasin nga malamdagan ang uban nga nagtuo nga fiesta sa among isla.

* * *

Kumusta na lang sa tanang mga Bantayanon labi na sa akong mga kabanay ug tanan nakong ka-batchmates sa Bantayan Southern Institute batch 1992 labi na nila Lea Sayson, Edwin Deldig ug Antonio Pasco nga apil sa mga napiling bag-o pisyal sa among batch nga last year mipahigayon sa among ika-20 ka tuig nga grand reunion.

Alang sa inyong mga reklamo text lang sa 09071678643 (BANAT NEWS)