CEBU, Philippines - Tandugon ang kahimtang sa usa ka ulitawo human kini hidunggabi samtang miuwang og away sa mga batan-on sulod sa diskohan sa barangay Dapdap, lungsod sa San Remegio kagahapon sa alas 4:00 sa kaadlawon.
Ang biktima mao si Ryan Potot, 20, ulitawo, nga molupyo sa maong lugar samtang ang suspek mao si Raffy Arnal, ulitawo, nga taga barangay Manyo.
Si PO3 CArlito Pasenio Jr., sa San Remegio Police Station mibutyag sa Banat News nga ang biktima mitambong sa disco atol sa pista sa ilang lugar dihang kalit lang nagkarambola ang mga batan-on nga nanayaw sa diskohan.
Ang biktima nga misuway pag-uwang sa maong kagubot nasaypan tingale nga kauban sa maong karambola ug maoy gidunggab sa suspek.
Nasabak sa kutsilyo ang dughan sa biktima busa gihatud dayon kini sa mga tanod ngadto sa Verallo District Hospital sa siyudad sa Bogo apan gibalhin sa tambalanan sa dakbayan sa Sugbo.
Ang suspek nga nadakpan usab sa mga tanod ug polis nga mirespondi sa alarma, nagtingkagol na karon sa prisohan samtang gihikay na ang kasong gipasaka batok kaniya. (BANAT NEWS)