CEBU, Philippines - Usa ka chief tanod ang gidakop human niya gipusil patay ang usa ka 23- anyos nga lalaki nga ingong gikalalis sa iyang igsuon sa miaging gabii sa bukirang barangay sa Sandayong Norte dakbayan sa Danao.
Si Kim Perez nakaangkon og daghang samad sa kalawasan human pusila ni Roel Entero, 43. Ang duha pulos nagpuyo sa samang barangay.
Daling gidala ang biktima sa Danao Provincial Hospital apan gi-deklarar kini nga patay na sa mga doktor.
Matud ni Insp. Romeo Caacoy, responding officer, nga si Entero mikomprontasi kang Perez human makigsinukmagay sa igsuon niini tulo ka adlaw na ang milabay.
“Ang igsuon sad sa suspek magmaoy man pud og mahubog maong nakulatahan,†sigon ni Caacoy.
Apan ang panagkomprontasi sa duha miresulta hinuon sa ilang away. Nianang mga alas 8:45 sa gabii, ingong nakit-an ni Entero si Perez nga naglakaw pauli gikan nag-inom sa may basketball court sa maong lugar ug dihadiha gipusil kini ni Entero sa makadaghang higayon.
Maayong pagkaigo sa biktima sa tuong bukton, tuong paa, tiyan, ug buko-buko nga ang bala pulos milapos sa dughan niini.
Si Entero boluntaryong mitahan sa barangay kapitan nga si Henara Manulat, kinsa maoy mi-turn over kaniya sa kapulisan.
Pakyas ang kapulisan sa pag-rekober sa .38 revolver ni Entero.
Kasong murder ang giandam karon sa kapulisan batok kang Entero nga nagtingkagol na sa karsel sa Danao City Police Office. (BANAT NEWS)