CV gipaubos sa heightened alert

CEBU, Philippines - Gipaubos na sa heightened alert ang tibuok Central Visayas isip pagtimaan sa Semana Santa niining  semanaha.

Ang chief of regional directorial staff SSupt. Edward Caranza mipadayag nga ang tanang kapolisan ila nang gipa-alerto sa tanang mga lugar nga posibling hugopan sa katawhan.

Dugang pa ni Caranza nga dublihon pa nila ang pagbutang og kapolisan, ilabi na sa mga terminal sa bus ug  sa pantalan  sa  mga  sakyanan  sa dagat.

Gibutyag usab niya  nga ila usab nga   destunohan  og  dugang pwersa sa kapolisan ang mga lugar sa dakbayan sa Sugbo ug  sa kalungsoran  nga maoy kasagaran nga dagsaan   sa mga tawo.

Ingon  usab  niini  ang  ilang buhaton  sa pagbantay  sa  Sugat unya  sa Domingo sa kaadlawon sa lungsod sa Minglanilla  diin  pabahaan  usab  nila kini  og  puwersa  sa  mga polis.

Gani, aduna usab sila’y ibutang nga police assistance desk sa matag pantalan ug terminal   nga  maoy  dali  nga duolan  sa katawhan  nga  makasugat  og  problema  sa maong  panahon.

Samtang, gipangandaman usab sa kapolisan ang mga turistang modagsa sa mga lugar nga  may tourist attraction  diin  adto  magsaulog sa  ilang Holy Week.

Matud pa ni Caranza nga adunay mga nadestinong tourist police nga maoy mogiya ug mo-entertain sa mga turistang adunay mga mahimamat nga problema.

Gipasidan-an usab ni Caranza ang tanang mga turista nga dili nalang gayud makig-estorya   sa  mga  tawong  dili  nila kaila aron dili mailad ug makuhaan o makawatan og mga importanteng gamit.

Giawhag   sa kapolisan   ang tanan nga magmatngon sa tanang lihok sa   mga tawo nga ikahimamat   nila ug dili lang gayud mosalig dayon kay posibling mangingilad ang ilang mahimamat.  (BANAT NEWS)