Election officer sa Sta. Fe girelibohan

CEBU, Philippines - Hingpit  na  nga girelibohan   ug gibalhin og  laing destino   sa gawas sa isla sa Bantayan ang election officer sa lungsod sa Sta. Fe,  sa  maong isla.

Si Neriza Gegant, election officer  sa Santa  Fe sa sayo  pa gipetisyonan  sa  daghang  mga  molupyo  sa maong  lungsod   gumikan  kay  wala  sila  makauyon  sa kinaiya  niini  pagdala  sa iyang  katungdanan.

Ang  pagbalhin kaniya  gisandig   sa  Comelec Resolution 9656 nga pinirmahan ni Comelec Chairman Sixto Brillantes   nga nagbalhin kang Gegante ngadto  sa  lungsod sa Borbon nga nasakop na sa ikalimang distrito.

Samtang ang mihulip kang Gegante mao ang election officer sa lungsod sa San Remegio nga si Alex Villacrusis.

Gawas kang chairman Brillantes,  mipirma usab sa maong Comelec Resolution   sila  si  Commissioner Lucinito Tagle, Elisa Yusoph, Christian Robert Lim ug Ma. Grace Cielo Padaca.

Ang comelec resolution gipadangat na ngadto kang Comelec Provincial Supervisor Atty. Eddie Abba nga miepekto sugod niadtong  Marso 20 niining   tuiga.

Tipik kini sa nasudnong lahugay sa Comelec sa tanang election officer aron pagsiguro nga limpyo ug patas  nga dili  kadudahan  nga  may  paboran  sila  nga  mga kandidato  sa umaabot  nga  piniliay  sa Mayo 13. Una nang gilahugay sa  milabay’ng bulan  ang mga provincial Comelec supervisor   sa tibuok  ug  usa  niini  mao  si   Provincial Comelec chairman Lionel Marco Castillano   nga  tua  na  karon edistino  sa lalawigan sa Bohol.  (BANAT NEWS)