CEBU, Philippines - Tulo ka milyon ka pesos ang gisugyot nga budget nga gastohon sa Tribu Lumad Basakanon aron ang ilang mga contingents makasalmot sa Aliwan Festival sa Manila karong sunod buwan.
Si Mayor Michael Rama mitando na sa hangyo sa iyang ig-agaw nga si Basak-San Nicolas Barangay Kapitan George Rama nga ang kantidad adto ibanon sa Pagcor Fund.
Ang City Accountant’s Office mipahibalo nga aduna pa’y P34 milyones ang Pagcor Fund nga mahimong gastohon hangtud sa miaging Marso 12.
Ang Cebu City Council mitugyan sa maong isyu ngadto sa Committee on Budget and Finance nga gipangulohan ni Konsehal Margarita “Margot†Osmeña aron tun-an kun angay ba nga gastohan sa dakbayan ang maong pagsalmot sa Tribu Basakanon sa Aliwan Festival.
Si Kapitan Rama daan na nga naniguro nga dag-on g’yud nila ang grand prize sa maong labing daku nga festival sa nasud, diin ang Tribu Basakanon nabutang na sa Hall of Fame. Ang Tribu Basakanon nakadaug sa grand prize sa tulo ka sunod-sunod nga higayon kaniadtong 2005, 2006 ug 2007. Ang maong kalihukan gigastohan sa dakbayan sa Sugbo.
Ang Aliwan Festival karong tuiga pagahimoon sa Abril 11 ngadto sa 13. Apan sanglit walay sesyon ang konseho karong Miyerkules, ang pagdiskutir sa maong isyu malangan g’yud pag-ayo. (BANAT NEWS)