CEBU, Philippines - Nadakpan na sa kataposan ang gipasanginlang lider sa guns- for- hire sa barangay Polpogan nga nalambigt usab sa illegal nga drugas kansang panimalay nga gironda niadtong milabay’ng adlaw nga Huwebes apan miresulta hinuon sa pinusilay.
Si Francisco Ariva alyas Boyet nasikop sa kapolisan sa Provincial Intelligence Branch atol sa ilang gihimong follow-up operation diha gihapon sa Polpogan alas-11 sa miaging gabii. Si Ariva diha ra diay nagtago sa balay sa iyang higala dili layo sa ilang balay. Nakuhaan gihapon kini og tag-as nga kalibre sa armas sama sa usa ka AR-15 Rifle; KG-9 submachine pistol ug kalibre .45 ug nagsuot usab kini og bullet proof vest uban sa mga bala.
Matud pa sa hepe sa kapolisan sa PIB Supt. Rodulfo Abotra nga dihang ilang nasikop si Ariva wala na kini misuway sa pagdagan o bisan na sa pagsukol sama sa gibuhat sa iyang upat ka kauban nga napatay sa mga polis niadtong Huwebes.
Namatay sa maong engkwentro sila si Vicente Judaya, Ian Siacol, Jerson Rema ug Rene Boy Tariao. Samtang nadakpan sila si Elvira Manlisi ug Jerry Bugtay.Gipangita pa karon sa kapolisan ang giingong kauban ni Ariva nga si Heronjo Lantaksi nga apil sa nakigpinusilay sa mga polis niadtong Huwebes. (BANAT NEWS)