Lalaking nag-suot og “Golden Wig” namusil
CEBU, Philippines - Patay ang usa ka 39-anyos nga lalaki sud sa usa ka videokihan diha sa dalan Lopez Jaena sa barangay Poblacion sa siyudad sa Lapulapu kaganihang kaadlawon.
Padayon pang gitumbok sa kapolisan ang wala mailhing gunman nga kalit misulod sa JP and J eatery and videoke house ug wala’y daghang pasumangil nga mipusil kang Jumar Lacinto gikan sa luyo.
Daling gidala sa tambalanan sa mga sakop sa Emergency Rescue Unit Foundation (ERUF) si Lacinto apan gideklarar kining patay na.
Matud pa ni PO2 John Carlo Jocutan, imbestigador sa maong kaso, dunay kaubang duha ka mga babaye si Lacinto nianang tungora.
Ang gunman matud pa nagsul-ob og golden wig, black jacket, si Lacinto naigo sa likod ug ang bala milapos sa iyang dughan nga nakaingon sa hinanali niyang kamatayon. Human sa hitabo, milakaw ang gunman ug gihubo ang iyang wig.
"Sa unahan na gitangtang samtang naglakaw nga mura lag way nahitabo," matud pa ni Jocutan.
Wa pa matino kung unsay motibo sa pagpusil sa biktima tungod kay wala’y nakaila kang Lacinto diha sa maong lugar.
Apan base sa pasiunang impormasyong ilang nadawat usa ka dispatser sa mga pasaheroan sa Cordova si Lacinto, apan dihang gisusi ang maong lungsod wala’y nakaila kaniya. (BANAT NEWS)
- Latest
