Nanglapas nga kabalayan sa salinas drive ipaguba

CEBU, Philippines - Gimandoan ang mga tag-iya sa kabalayan nga miukopar sa aseras sa Salinas Drive atbang sa Technical Education Skills and Development Authority (TESDA)   nga boluntaryong gub-on ang kabahin sa ilang balay nga milapas sa aseras.

Si Portia Baquita nga giilang lider sa maong mga lumulopyo maoy gipadad-an og suwat ni Engr. Nicomedes Leonor, ang district engineer sa Department of Public Works and Highways (DPWH).

Sa kahadlok sa 27 ka pamilya nga nagpuyo sa maong dapit atbang sa TESDA midangop sila kang Konsehal Alvin Dizon, nga maoy pangulo sa Committee on Housing sa Cebu City Council.

Ang maong mga pamilya mihangyo nga unta hatagan sila og dugang lugway sa paguba sa kabahin sa ilang kabalayan nga milapas na sa aseras.

Gusto ni Engr. Leonor nga hawanan daan ang maong dapit kay aron andam na kun himoan na og aseras nga kaagian sa mga tawo ang daplin sa karsada.

Si Mayor Michael Rama nagplano usab nga moawhag sa Kapitolyo ug TESDA nga sibugan ang koral sa TESDA aron kabuhatan og aseras.

Ang Cebu City Council miduso sa suwat sa mga hingtungdang pamilya ngadto sa DPWH.

Daghang mga nagtrabaho sa IT Park nangreklamo kay imbes anha sila moagi sa aseras, mapugos sila paglakaw sa karsada kay ang gamay kaayo nga aseras giukopar ug gihimong mga tindahan sa mga tag-iya og kabalayan. (BANAT NEWS)